Joh 3 | YML | STEP | Ielusalema 'waineye tamu Diu totafalolo Falisi 'ana wagava Nikodimo i miamia, we'e taunina tamu me Diu to'edakumeta bwaikina.

John 3

Iesu i veifufu Nikodimo taiadi.

1 Ielusalema 'waineye tamu Diu totafalolo Falisi 'ana wagava Nikodimo i miamia, we'e taunina tamu me Diu to'edakumeta bwaikina. 2 Tamu lovana i mai Iesu 'waineye i voneni i vo, 'Auvea, 'a 'asetamu 'omu Tove 'u mai Yaubada 'wainega. Kebu tamu aitoi 'ana fata 'eba nuavogana wata 'eba nua'ewa 'u 'i'idewadiga wata bani'odi i na 'idewadi 'ai'edi Yaubada kebu toketokena i na veleni.” 3 Siwe Iesu i voneni i vo, A vona mogitana 'waimuye 'ai'edi aitoi kebu i na tubuve'ivau, kebu 'ana fata i na luku Yaubada yana 'Eba Veimea 'waineye.” 4 Nikodimo i velutoli i vo, Tulaidi bani'odi i na munega i na tubuga-vaitugana? Kebu 'ana fata tamu tomogo i na luku inana umwadie wata i na tubuga-vaitugana.” 5 Iesu i vona i vo, Tomotoga inadiavo 'waidiega i tubuga taunidi 'asa'aiana 'adi wagava tomotoga, fwayafwaya 'ana nuanua 'waidie bwaikina. Siwe egavo i na tubuve'ivau 'Anu'anunu 'Atumaina 'wainega, 'Anu'anununina 'akonadi i agedi i 'ive'ivaudi. A vona mogitana 'waimuye, 'ai'edi tamu aitoi kebu i na tubuve'ivau ufa wata 'Anu'anunu 'Atumaina 'waidiega 'ako kebu 'ana fata i na luku Yaubada yana 'Aila'a nageneye bega i na veimeyeni. 7 Kebu nuamu i na vogani fai a vo, I lubwainemu 'u na tubuve'ivau.” 8 Kaukau taunina yana nunuga i veveimeyeni. Butu'aina ta noganogai siwe yana 'eba toa kebu ta da 'asetaiga wata kebu ta da 'asetai ava'aibe bei i nunago. Wata bani'odi egavo i na tubuve'ivau 'Anu'anunu 'Atumainega, yadi sauluva 'ivauna ta na 'iseni ta na 'asetai 'Anu'anunu 'Atumaina i agedi siwe kebu ta da 'asetaiga bani'odi i munega 'alo ma'avia i agedi.” 9 Nikodimo i velutoli Iesu 'waineye i vo, Yamu vona 'ana 'aseta bani'odi? A bavuyeni.” 10 Iesu i vo, 'Omu me Isileli yama tove bwaikimu, awale naninidi a veveifufuyediga 'u bavuyedi? 11 A vona mogitana 'waimuye, ava'ai 'a 'isedi wata 'a 'asetadi 'a veveifufuyedi 'waimuye, siwe kebu tamu aitoi 'waimiega yama vona faifaidi i da ve'awamogitana. 12 Naninidi a veifufuyediga fwayafwayayega siwe kebu 'u da vetumagana. We'e 'ai'edi naninidi abamega a na veifufuyediga, mogitana 'u na bavu-'afo'afo. 13 Kebu tamu aitoi i da laka abame wata i da vila-vaitugani i da obuma, yau a vetomotogaotoga 'aiseotogiku abamega a obuma begaidi ma yaku 'aseta a veveifufu.

14 Basenadiotoga sali'avu'avuye Mosese kumaea 'o'olo bani'odi i silakai bega egavo i 'isalaka 'waineye kebu i da wafaga ^{▼▼Me Isileli Yaubada i vedumwe'ai'aieni bega Yaubada 'o'olo i vetunedi 'waidie, egavo i ovadi i wafa-matayo'o. Yaubada Mosese i voneni kainumu i dabia 'o'olo bani'odi i silakai bega egavo i 'isalaka 'waineye 'aivaita i veluagai.}.” Yau wata bani'odi, i lubwaineni 'awaie yau a vetomotogaotoga tomotoga i na silakaiku 'ai lagalagana 'waineye bega egavo ma yadi vetumagana i na tauyedi 'waikuye mia 'atumaina wata miamia-vagaina i na veluagai.

S1 Ion 7:50-51, 19:39S3 1 Fit 1:23S5 Tai 3:5
S6 Ion 1:13S14 Num 21:9 Ion 12:32

Yaubada i nuakalikalieda bwaikina.

16 Fai Yaubada tomia fwayafwaya matatabumi i nuakalikaliemi bwaikina, begaidi yau natuna yana tamogana i 'aniveleneku 'waimie bega egavo taunidi ma yadi vetumagana i na tauyedi 'waikuye kebu i na wafa mogitana, mia 'atumaina wata miamia-vagaina i na veluagai. 17 We'e Yaubada kebu i da vo, Natuku a na vetunei bega yana veimea 'wainega tomia fwayafwaya vematavuloga i na veluagai,” kebu, i vetunekuga tomia fwayafwaya a na 'ita'ita'iemi sakona 'waidiega.

18 Egavo ma yadi vetumagana taunidi i na tauyedi Yaubada Natuna 'waikuye kebu vematavuloga i na veluagai, siwe egavo i baila 'akonadi Yaubada i veimea vematavuloga i na veluagai fai kebu i da vetumagana Yaubada Natuotogina tubu'eaku 'waikuye. 19 Yau Yaubada Natunanina a maiga bani'odi mageta tomia fwayafwaya 'waimie, siwe tomotoga fuedi nuanuadi dudubala fai i vevesauluva sakoidi, begaidi kebu nuanuadi mageta, faifainanina vematavuloga i na veluagai Yaubada 'wainega. 20 Tomotoganidi yadi sauluva sakoidi mageta i baila, fai kebu nuanuadi yadi sauluvanidi sakoidi i na sivemagesedi. 21 We'e egavo yadi sauluva tonovidi, ma yadi sosoana i na maia magetanina 'waikuye bega tomotoga fuedi i na 'isedi i na 'asetadi Yaubada yana nuanua 'ana todumwebika.”

S16 Lom 5:8 1 Ion 4:9-10S17 Luk 19:10 Ion 12:47
S18 Ion 3:36S19 Ion 1:5

Ioni Tobafitaiso i veifufu Iesu faifaina.

22 Iesu i veifufu'a'ava Nikodimo 'waineye, mulieta yana tovetutuyamavo taiadi i nagoi 'awalawa Iudia 'waineye. Bei sai'afo i yogomia wata bei yana tovetutuyamavo tomotoga fuedi i bafitaisodi Iesu yana veimea 'wainega. 23 Bola Ioni Tobafitaiso kebu i da lukuga vanuga 'eba yogona 'waineye i nago 'atamana Ainoni, Selimi lilivaneye. Bei tomotoga fuedi i nunagoi 'waineye i bafitaisodi ufanina bwaikina 'waineye.

25 Tamu 'aiata, tamu tomogo Diu i nago Ioni Tobafitaiso yana tovetutuyamavo 'waidie taiadi i ve'ikwayekwayega i vo, Aitoi yana bafitaiso 'atumaiotogina bega 'ana fata tomotoga i na ve'atumai Yaubada mataneye?” 26 Begaidi yana tovetutuyamanidi i nagoi Ioni i voneni i vo, Tove, 'u na nuani, tomogonina taiadi 'wa miamia Ufa Iolidani we'e no'o bega wata kumanina faifaina 'u veveifufuga, valana 'a nogai tomotoga fuedi i baibailemu i nunagoi 'waineye bafitaiso faifaina.” 27 Ioni i vonedi i vo, Yaubada abame tomotoga 'aitamogana 'aitamogana yada folova i veleda. 28 'Wa na nuani basenadi a vonemi a vo, Yau kebu kumaniku Keliso, yau a na vetomata'aulelemo faifaina.” 29 Side bani'odi. Nagi 'ana tutuye tonagi nani fuedi i veveluagadi, 'ani'ani, kukua wata tomotoga i veve'ililibuyeni i sososoana faifaina, we'e iana tosigeugeu kebu 'ana fata i na nuavita i na sosoanamo. Wata yau bani'odi, kebu 'ana fata nuaku i na vita fai iaku Iesu tomotoga fuedi i veve'ililibuyeni wata i sososoana faifaina. Tomotoga i baibaila 'waikuyega i nunagoi Iesu 'waineye, faifaina a sosoana bwaikina. 30 I lubwaineni Iesu i na vetomogo-bwaika, yau ma'itufa a na obu.”

S24 Mad 14:3-4S26 Ion 1:26-34S27 Ion 19:11

Kumanina i mai abamega.

31 Aitoi i tubuga fwayefwayeye bei i miamia, begaidi tutuya fuedi i veveifufu nani fwayefwayeye faifaidi, we'e Yaubada Natuna i mai tabwanega kebu bani'odi tomotoga, taunina bwaikaotogina wata nani matatabuna 'adi toveimea. 32 Kumanina i obuma tabwanega naninidi bei i 'isediga wata i nogaidi i lulu'ivoneyedi tomotoga 'waidie, siwe kebu fuedi bonana i da 'ewai. 33 Egavo Yaubada Natuna yana vona i vetumaganeni, taunidi wata Yaubada yana vona i ve'awamogitaneni. 34 Kumanina Yaubada i vetunei 'waideye Yaubada yana Vona 'ana tolu'ivona fai 'Anu'anununa mogitana i agei. 35 Yaubada Natuna i nuakalikalieni bwaikina, begaidi nani matatabuna i 'anivelenedi 'waineye i na veveimeyedi. 36 Egavo ma yadi vetumagana taunidi i tauyedi Yaubada Natuna 'waineye mia 'atumaina wata miamia-vagaina 'akonadi i veluagai, we'e egavo i vedumwe'ai'aieni kebu mia-vagatanina i na veluagai, Yaubada yana nuasako i na 'eno-vagata 'waidie.

S31 Ion 8:23S34 Ion 1:32-34S35 Mad 11:27 Ion 5:20
S36 Ion 3:16-18 1 Ion 5:12